واٹس ایپ کا نیا نوٹیفکیشن ببل فیچر: صارفین کے لیے بڑی سہولت کا امکان

میٹا کی زیرِ ملکیت میسجنگ ایپ واٹس ایپ میں ایک بظاہر معمولی مگر نہایت اہم فیچر متعارف کرانے کی تیاری کی جا رہی ہے، جس سے صارفین کے چیٹنگ کے انداز میں نمایاں تبدیلی آ سکتی ہے۔

ٹیکنالوجی ویب سائٹ WABetaInfo کی رپورٹ کے مطابق واٹس ایپ کے اینڈرائیڈ بیٹا ورژن میں نوٹیفکیشن ببلز کی آزمائش جاری ہے۔ یہ فیچر اینڈرائیڈ 10 اور اس کے بعد کے ورژنز میں گوگل کی جانب سے فراہم کردہ سپورٹ پر مبنی ہے۔

اس فیچر کے تحت جب کسی فرد یا گروپ چیٹ کا نیا پیغام موصول ہوگا تو اس کا ایک فلوٹنگ ببل موبائل اسکرین پر ظاہر ہوگا، چاہے صارف ہوم اسکرین پر ہو یا کسی اور ایپ کو استعمال کر رہا ہو۔ اس ببل میں متعلقہ کانٹیکٹ یا گروپ کی پروفائل تصویر کے ساتھ واٹس ایپ کا چھوٹا آئیکون بھی دکھائی دے گا۔

صارف جیسے ہی اس فلوٹنگ ببل پر کلک کرے گا تو چیٹ ونڈو فوری طور پر کھل جائے گی، جہاں وہ پیغام پڑھنے اور جواب دینے کے قابل ہوگا، بغیر اس کے کہ مکمل ایپ کھولنی پڑے۔ اس طرح ملٹی ٹاسکنگ مزید آسان ہو جائے گی۔

نوٹیفکیشن ببلز کی بدولت صارفین ایک وقت میں متعدد چیٹس کو منظم انداز میں ہینڈل کر سکیں گے۔ حتیٰ کہ ویڈیوز دیکھتے یا دیگر ایپس استعمال کرتے ہوئے بھی پیغامات کا فوری جواب دینا ممکن ہوگا۔

رپورٹ کے مطابق فی الحال یہ فیچر محدود بیٹا صارفین کے لیے آزمایا جا رہا ہے۔ کمپنی کی جانب سے تاحال اس کی باضابطہ ریلیز کی تاریخ کا اعلان نہیں کیا گیا، تاہم توقع ہے کہ کامیاب آزمائش کے بعد اسے تمام صارفین کے لیے متعارف کرا دیا جائے گا۔